"Casual Fridays"

Í gærkvöldi sagði Erna mér hróðug að á morgun væri "Casual Friday" í vinnunni. Ég hváði við og spurði hvað í ósköpunum það væri enda held ég að almennt sé þetta hugtak ekkert sérstaklega vel þekkt á Íslandi. Jú, þá mega lögfræðingarnir hjá Holland & Knight sem sagt mæta frjálslega klæddir í vinnuna. Þá erum við ekki að tala um gé-streng og netabol heldur meira svona gallabuxur og pólobol eða eitthvað álíka. Þetta þykir afar skemmtilegt á þeim bænum og ég sé liðið alveg fyrir mér hoppandi um af kæti í gallabuxunum.

Sitt er hvert flippið því ekki þótti svona lagað flipp á mínum vinnustöðum hjá borginni (meira svona norm). Er farinn að gera mér betur og betur grein fyrir því hversu flippaðir mínir vinnustaðir hafa verið undanfarin ár.

Það þarf svo ekki að taka það fram að Erna fór hér út í morgun með bros á vör í gallabuxum og bol, tilbúin að takast á við flippaðan vinnudag á lögmannsstofunni........