Töffari Töffaranna.......

Fórum á þessa líka tónleikanna með U2 í gærkveldi. Þessir tónleikar voru hluti af tónleikaröðinni Vertigo. Þeir voru haldnir í American Arena þar sem Miami Heat spila t.d. í NBA. Ansi magnað mannvirki sem tekur um 20.000 manns í sæti og það var náttúrulega löngu uppselt á þessa tónleika. Davíð og Ólöf höfðu verið svo forsjál að fjárfesta í fjórum miðum fyrir einhverjum mánuðum síðan og eiga þau þakkir skildar fyrir að gefa okkur tækifæri á að nýta aukamiðana tvo.

Tónleikarnir voru vægast sagt frábærir og U2 meðlimir í rokkna stuði. Bono er konungur rokksins um þessar mundir, engin spurning. Þvílíkur töffari, sá allra svalasti í bransanum. American Airline Arena (http://www.aaarena.com) er þannig hannað að sviðið er umkringt áhorfendum á alla kanta alveg uppí rjáfur. Það myndast því ansi góð stemmning þarna og hávaðinn ótrúlegur.

Ég man ekki eftir því hvenær ég fékk gæsahúð síðast á tónleikum en mig minnir að það hafi verið á Bowie tónleikunum heima. Þeir tóku hvern slagarann á fætur öðrum ásamt efni af nýjustu plötunni, How To Dismantle An Atomic Bomb. Þessir tónleikar fá fimm stjörnur af fimm mögulegum hjá Fúsagagnrýni ehf... Á myndasíðunni eru nokkrar myndir frá tónleikunum fyrir þá sem hafa áhuga.

Glöggt er gests augað

Gulli kom í óvænta heimsókn nú um helgina (er reyndar hér enn þegar þetta er skrifað). Fyrir þá sem ekki þekkja til kauða þá var hann annar tveggja veislustjóra í brúðkaupinu okkar ásamt sinni heittelskuðu Önnu Maríu. Það er ansi góður fengur í honum Gulla, þar sem hann bjó hér í Miami í tvö ár áður en hann flutti til New York og þekkir því vel til staðhátta (og svo er hann náttúrulega svo afburðar skemmtilegur drengurinn). Hann tók því að sér hlutverk "gæds" fyrir okkur hjónin nú um helgina.

Byrjuðum reyndar á því að sýna honum hverfið okkar en það endaði með því að með aðstoð hins þefvísa Gunnlaugs fundum við ansi skemmtilegan "Salsa-bar". Við erum sem sagt búin að búa hér í um 3 mánuði án þess að uppgötva þessa perlu og þurftum utanaðkomandi hjálp til þess. Þegar inn var komið dundi dynjandi salsamúsík yfir okkur ásamt dansandi kúbönum um allt gólf. Við tókum náttúrulega nokkra góða salsatakta þarna inni og fengum okkur eins og einn til tvo suðræna drykki. Á heimleiðinni þefaði Gunnlaugur svo uppi enn einn stuðstaðinn sem við "gamla settið" höfðum að sjálfsögðu ekkert vitað af...

Á laugardaginn fórum við uppí skóla að læra en á meðan einbeitti Gulli sér að sundlauginni okkar og skoðaði næsta nágrenni á hjólfáki húsbóndans. Um kvöldið fórum við á South Beach á veitingastað sem "gædinn" mælti með. Ansi vel valið hjá pilti verð ég að segja. Þar hittum við Davíð og Ólöfu sem höfðu verið að túrhestast eitthvað á svæðinu þá um daginn.

Í dag, sunnudag, fórum við svo í afar vellukkaða ferð útá Key-Biscane sem er eyja hér rétt fyrir utan, hlaðin fallegum ströndum, bátalægjum og göngu- og hjólreiðastígum. Ákaflega gaman að rölta þar um á ströndinni í 28 stiga hita og sól. Eftir þá ferð fórum við svo og fengum okkur í gogginn á skemmtilegum veitingastað sem er við höfnina hér í Miami, mitt á milli bátastafla.

Það er á hreinu að Gulli hefur kennt okkur ansi margt á þessum stutta tíma sem hann hefur verið hér og nýjar hliðar Miami hafa opnast fyrir okkur skötuhjúum. Við verðum orðin ansi fær í að "gæda"um Miami þegar fyrstu gestirnir koma nú um jólin.

Fullt af myndum frá helginni á myndahluta síðunnar, endilega að skoða....

kk.,
Sigfús og Erna

P.S. Erum að fara á U2 tónleika á morgun með Davíð og Ólöfu, ekki leiðinlegt það...

Komin aftur á 21. öldina

Fengum hið margfræga internet á ný nú á sunnudaginn ásamt hinu ástkæra kapalsjónvarpi (með öllum þeim auglýsingum sem því fylgir). Við erum því komin á 21. öldina á ný og getum sólundað tíma okkar í að vafra um víðáttur internetsins og glápa á innihaldslausa framhaldsþætti á ný. Þvílík dýrð og þvílíkur unaður....

Vorum að koma inn eftir háskalegan hjólreiðatúr. Þannig er nefnilega mál með vexti að hér í Miami er ekki beint gert ráð fyrir gangandi eða hjólandi vegfarendum frekar en víðast hvar í henni Ameríku. Hjóluðum í átt að hverfi sem heitir Coconut grove og skoðuðum þær fjölmörgu "glæsivillur" sem þar eru. Það dimmir mjög snögglega hérna og það ansi snemma eða um kl. 18:00 (skil ekki alveg þessa tilfærslu á tímanum um daginn, held að hann sé sérhannaður fyrir ýktar A-týpur sem vakna kl. 6 á morgnanna). Við stödd í einhverju hverfi sem við þekktum ekki alveg og þurftum að rata heim í myrkrinu á götum sem voru að sjálfsögðu án hjólreiða- eða göngustíga. Hjóluðum á móti umferð til að sjá allavegana óvininn og húsbóndinn fór í forsvari til að taka á móti þeim bílum sem á okkur myndu keyra (eiga náttúrulega ekki séns í 110 kg. Ísmann). En við komumst sem sagt alla leið heim heilu og höldnu og erum bara nokkuð sátt við þann árangur.

Annars er það helst að frétta að húsbóndinn er orðinn formlegur meðlimur í borðtennisklúbbi UM og er þar að rifja upp gamla takta. Þegar hann mætti í sinn fyrsta tíma spjallaði hann létt við forseta (allir bera virðulega titla hér í US sama hversu ómerkilegt félagið er) borðtennisklúbbsins og sagði eitthvað á þá leið að þarna væru greinilega margir ungir og efnilegir spilarar. Forsetinn svaraði: "yes, you are deffinately the oldest one". Gaman að þessu, s.s. það fer ekkert á milli mála hver er aldursforsetinn þarna í þessum líka fína klúbbi. HAHHAHAHAHHA. Hún var nú ekki með mikinn kjaft eftir að ég malaði hana í sportinu stuttu seinna... múhahahahah

Við Davíð erum svo á leiðinni í að gerast meðlimir í tennisklúbbnum og fótboltaklúbbnum. Aðeins meira sexí klúbbar en ping-pong klúbburinn ekki satt? Ping-pong í kvöld? (Þór í Dalalíf). Ég verð sem sagt orðinn ansi vel klúbbaður þegar ég kem heim næsta sumar....

Ég og Erna fórum í kokteil á vegum lagadeildarinnar á föstudagskvöldið þar sem vel var veitt og fólk almennt í miklu stuði. Á myndasíðunni okkar er fullt af samkvæmismyndum frá þessu tilefni fyrir þá sem hafa áhuga á slíku. Fjölþjóðlegt að vanda og eftirpartý hjá einum bekkjarfélaganum.

Svo er námsstressið farið að gera vart við sig en það er ýmislegt á dagskrá í þeim efnum næsta einn og hálfan mánuðinn eða svo. Fullt af ritgerðum, prófum og almennum skemmtilegheitum......

kv. úr sólskinsríkinu,

Sigfús og Erna

Suðurríkjaflakkið

Erum enn án internettengingar heima og sjónvarps en kvörtum svo sem ekki þar sem fullt af fólki er enn án rafmagns...

En hér kemur s.s. heilmikið blogg um suðurríkjaferðina okkar, ferðin sem var farin að tilstuðlan Wilmu blessunarinnar. Mikið ósköp var þetta rétt ákvörðun hjá okkur, höfum nefnilega verið að tala við fólk sem var hér allan tímann og það var ekkert sérstaklega skemmtilegt að mér skilst. T.d. útgöngubann frá 18-06 nokkra daga o.s.frv.


Ferðin okkar var vægast sagt mjög góð og fengum við frábærar móttökur hjá þeim Berglindu og Benna, þ.e. hjá BB-Flóttamannahjálpinni. Enginn hafði búist við þetta langri heimsókn (um vika) en hún verður lengi í minnum höfð. Benni sá um að halda okkur í formi með ýmsum leikjum s.s. tennis, kajaksiglingu, og golfi. Höfum sennilega ekki hreyft okkur eins mikið í langan tíma. Á hann þakkir skildar fyrir að hrista okkur aðeins til.

En ætli sé ekki best að segja sögu þessarar ferðar í myndum og vísa ég því á myndahluta síðunnar okkar. Þar eru komnir fjórir skammtar af myndum úr ferðinni (dugaði ekkert minna). Hvet ykkur til að kíkja á þær. Slóðin er:

http://www.myndasidanokkar.blogspot.com

kk.,
Sigfús og Erna